baatein iski apno mein kehne ka
na jaane vo jamana kab picche chhoot gaya
mere yaadon ke khajane ko koi loot gaya
jis chowk ke chakachoundh ko tarasti thi aankhein
usse hoke guzarne mein ab dar lagta hai
vo bhi is kadar lagta hai
ki ab wahan na jana hi behtar lagta hai
baarish ke baad mitti ka mehakna
subah ki kirno mein chidiyon ka chehkana
hawa ke jhonko se abtak wahi khusbu aati hai
par fir bhi lagta hai koi rishta na baaki hai
sochta hu kya koi apna tha mera
is shehar mein, is watawaran mein
yahan ke logo mein, is paryawaran mein
kuch dur ho jaye,kuch chhoot jaye,aisa kuch kahan tha mera
jane ye kiska dosh hai
kyun hota na mujhe afsos hai
har kona dekha maine, har gali se guzra hu
fir kyun lagta hai, aaj hi aaya hu aur aaj hi ja raha hu
khayal aata hai, dur milon apna ek shehar hai
jahan pe main pala, badha, chalna sikha
pyar ka matlab samjha, pyar karna sikha
apna to bas wahi hai,ye to kisi aur ka ghar hai
abhishek kunal
